ي مع حالات الحمل والولادة .. تزوجت يوم 28.4.2014 والحمدلله صار حمل من اول دورة بعد الزواج وكانت اول يوم 2.5.2014 واستمر الحمل على احسن حال الى يوم عيد الاضحى ولأني تعبت فيه صارلي نزيف قوي وكان التشخيص نزول فالمشيمة وطلبو مني الراحة التامة وكان وقتها الحمل وصل فالاسبوع 21 واستمر النزيف لمدة 12يوم حتى الاسبوع 23 في بداية السادس وبدأت انحس بوجع والام الولادة ولما مشيت للمشفى قالولي انه البيبي نازل وانه ولادة مبكرة وفعلا صارت الولادة وانتهى الحمل الاول بولادة بنت اتوفت بعد 11 ساعة بتاريخ 11.10.2014.. والحمل التاني كان اول يوم بآخر دورة 31.12.2014 وأيضا استمر الحمل على احسن حال واخدت ابر التثبيت والتزمت بالراحة الى الاسبوع 21 ااشهر الخامس وبيوم شفت ولد عمي كان طفل صغير ولكنه ثقيل الوزن ونسيت نفسي وقمته فحضني فتسبب لي بنزيف قوي لمدة يومين وكان التشخيص انفصال فالمشيمة وكان لابد انهم يولدوني لأنه التغدية مش حتوصل للبيبي وحيموت في بطني والافضل يولدوني وهوا عايش وفعلا اعطوني وجع صناعي وولدت ولد وعاش لمدة ساعتين وتوفى وانتهى الحمل الثاني يوم 28.5.2015.. الحمل الثالت كان اول يوم بآخر دورة 5.8.2015 وبعد ولادتين مبكرتين قررت الدكتورة انه الحمل التالت يربطولي عنق الرحم بتوقع منها انه عندي ارتخاء عنق الرحم ..وفالاسبوع ال13 نهاية الشهر التالت درتها العملية ومعاها تحاميل وابر التثبيت والراحة واستمر الحمل على خير الى الاسبوع 35 نزلت مني امية الراس فدخلوني المستشفى وفكولي الربط بنفس اليوم اضطراري وكان المفروض ينفك بعد نهاية الاسبوع 37 وقعدت ناخد فالمضاد وطبعا جهاز نبض البيبشي يوميا لمدة 12 اليوم الى ان صار عندي تكلسات بالمشيمة وقالولي انه لابد انه نولد بأسرع وقت لو مش طبيعي قيصري وكنت يومها اول يوم بالاسبوع 38 تامن يوم بالتاسع وبدأت نتمشى في ممرات المستشفى وبعد ساعتين بدأت عندي الام الولادة وبعد اربع ساعات بدأ الوجع يتزايد الى ان تمت ولادتي طبيعيا وكانت ولادة غير عدد1سيرة ولله الحمد بسبب انه عندي ارتخاء عنق الرحم ونزول المية ووزن الجنين كان مش كبير وكلها مسهلات ولاده وانتهى الحمل التالت لولادة ابنتي ميران وزنها 2600 ج يوم 20.4.2016 وكان موعدي يوم 12.5.2016 .. ولأنه ولادتي كانت يسيرة وسريعة قررت الدكتورة انه لابد في كل حمل يربطولي عنق الرحم .. الحمل الرابع كان غير مخطط ليه وكنت نحسب بالايام لمنع الحمل (مانع طبيعي) لاني كنت انرضع في بنتي وقاعدة مافطمتهاش واستغربت من حدوت الحمل ..وكانت اخر دورة 3.10.2017 ووقت فوات موعد الدورة حللت وماطلعتش حامل وفات اسبوع وعاودت التحليل وكان سلبي وفات اسبوع وحللت وطلع سالب ولحد مافات شهر واسبوع حللت وطلع ايجابي خط خفيف ووقت مشيت للدكتورة مابانش الكيس ولا حتى النبض واستغربت لأنه المفروض يبانلها على حساب اخر دورة ف حكيتلها ووقتها شكت انه يكون حمل خاسر "كادب او وهمي " وعطتني مهلة اسبوعين ولو مابانش بعدها لا الكيس ولا النبض حتجهضني طبعا في حالة ما اجهضتش تلقائيا وقالتلي لو صارلك نزيف من غير تعب هادا معناها انه فعلا حمل خاسر لأنه عادة الجسم يعتبره شيء غير طبيعي فيتم رفضه ومحاربته تلقائيا فيحدث الاجهاض وهادا اللي صار فعلا فيوم 25.12.2017 صارلي نزيف وصار ينزل كتل كتل ونزل الكيس وما استحقيتش عملية تنظيف والحمدلله وكان التشخيص انه البويضة اتلقحت وهيا في مرحلة الشيخوخة وماكان عندها القدرة على تكوين جنين سبحان الله .. الحمل الخامس كان مرغوب ومخطط ليه وعلى اساس انه نبي نولد ف اخر السنة 2018 وكانت اخر دورة 4.4.2018 وكان موعد ولادتي المحتما 11.1.2019 وكنت معتمدة على ارتخاء عنق الرحم وانه مش حنفوت فالشهر التاسع الا اسبوع او 10 ايام بالكتير ..المهم الحمل عدى على خير الحمدلله وطبعا بعملية الربط فالشهر التالت والراحة التامة وابر الرئتين والخوف من نزول المية او اي اعراض للولادة المبكرة كان مستمر لحد ماوصلت للاسبوع 36 اخر ايام التامن جاني وجع قوي ومستمر ومشيت للمستشفى فقررو انه لابد من فك الربط الا انه الخوف من حدوت ولادة فورية وانا فالتامن والمغامرة بالجنين رفضو يفكوه الا اذا كان الوجع لا يحتمل وغادرت المستشفى وغادرني الوجع سبحان الله وبعدها اختفى ولا كانه حسيت شي ..ووصل موعد فك الربط وكان يوم 18.12.2018 نهاية الاسبوع ال37 وفكيته وبدأت اتمشى على اساس ارتخاء عنق الرحم يوم يومين ونولد ..ولا اتر للوجع والتمر هادا كليته لوين ما تمرو عيوني ولا اا نتيجة ..ركبت الدروج 12 مرة متواصلة للطابق الرابع ونزلت لوين ماحيلي انهد ولااااااا كأنه ..نتمشى 4 ساعات متواصلة يوميا ..شريت عشبة كف مريم وشربت خليط الحليب والقرفة والعسل وزيت الخروع ودهنت بيه..الكحل والرب ..ولا حياة لمن تنادي وفيوم 30.12.2018 رقصت نقزت جريت قمت الرزين وماااااهئه مش ناوي ينزل انا بديت نستسلم وقلت البيبي يبي يكون اصدار 2019 شكله وف نفس الليلة حسيت انه الحركة نقصت مش زي قبل وبالهبل اللي درته خفت انه الجنين يضرر فيوم 31.12.2018 الصبح مشيت للدكتورة وحكيتلها اللي صار دارتلي تخطيط قالتلي بنديرلك عملية لانه التخطيط مش كويس خفت من العملية وقررت انشوف دكتورة تانية ومشيت لدكتورة تانية وحكيتلها نفس الشي واني مانبيش عملية كشفت عليا لقت انه التوسع عندي 4 سانتي ودخلتني لصالة الولادة فجرتلي كيس البيبي ودارتلي وجع صناعي والتخطيط كان كويس واتفاجئت بنزول المية ولمت سألت قلتلي انه انا حالة ولادة وسبب عدم زيادة التوسع هو انه رأس الجنين نازل على مساره الطبيعي وبدأ عندي الوجع وكل شوي يزيد اكتر واكتر وفي ساعة من الزمن شرفني ابني اللي جبر بخاطري بعد ما بدا العد التنازلي ولحق على 6 ساعات ف 2018 وكان وزنه 3 كيلو واخترت له من الاسماء ايوب وتمت ولادتي على خير الحمدلله الحمل السادس .. كان غير مخطط ليه ولكن فرحت بيه كنت انرضع في ولدي ايوب وماكنتش ناوية نفطمه ..كانت اخر دورة يوم 6.12.2019 وكنت حاسة اني بنطلع حامل فهالشهر وفعلا ..فالاول ماحبيتش اندير عملية الربط حسيت اني مش بحاجة ليها ولكن فالشهر التالت نزل مني دم قليل مش هلبا ولكن خوفني ف اسرعت وربطت خير من الندم يوم 9.3.2020 كان موعد العملية وتمت على خير الحمدلله ..وفي نهاية الشهر الرابع مشيت عند الدكتورة لمعرفة جنس الجنين وقالت لي انه ولد واللي يجي من الله حلو عندي بنت وعندي ولد الحمدلله ..وماتابعتش بعدها بسبب الكورونا ..والحمدلله مضت فترة الشهر الخامس والسادس والسابع على خير ولم احتاج لزيارة الدكتورة ..في بداية الشهر التامن نزلت مني ماء الجنين كمية قليلة ولما نزلت مرة تانية مشيت للاطمئنان وخبرتني انه في نقص فكمية الماء وخبرتني انه الجنين بنت ..فتفاجئت بالخبر ونصدمت فقط لانه الدكتورة الاولى خبرتني انه ولد وليس لرغبتي فولد وعدم رغبتي في بنت كانت مجرد تهيئة نفس لجنس المولد .. المهم قررت انزور دكتورة اخرى لتحديد الجنس والتأكد وفعلا زرت دكتورة تالته وحكيتلها اللي صار معاي وبعد فحص طوييييييييل الوقت كي تتأكد حكتلي انها بنت ..الحمدلله اكيد وتمنيت الصحة والسلامة لي وليها واني نفرح بيها مع شك كبير في داخلي انها بنت ..وفي يوم نقصت حركة الجنين وماحسيت بيها الا مرة او مرتبن ف اخترت نمشي عند دكنورة استشارية انكمل معاها مشوار الحمل وبرضو نعرف اذا كان بنت او ولد ونقطع الشك باليقين وأكدتلي انه ولد وطبعا بعد ما اطمئننت على صحة الجنين فصرت في حيرة من امري واشتريت الوان محايدة فكل شي وبعدت عن الوردي والسماوي وماكان عندي الا انتظار الولادة حتى نعرف .. وفي يوم 23.8.2020 فكيت الربط .وكان بدأ عندي التوسع 2cm وبعدها بدأت فسبل تسهيل الولادة من خلطات ومشي وصعود الدرج ورقص وحمام ساخن والخ ..فخلال اسبوع زاد التوسع فقط سم واحد وصار 3cm.. وفي يوم الجمعة 4.9.2020 كانت الولادة والحمدلله تمت على خير .. بدأ عليا الوجع خفيف من الليل تم بدأ يزداد حدة وقوة ويتقارب من الساعة 4 عصرا صار الوجع اقوى واكتر قرب من بعضه كنت ببيت اهلي اتصلت بزوجي وخبرته عالوجع وخاصة اني تاركة شنطة البيبي والتحاليل فبيتي .. كذبت على امي واختي قلتلهم بنطلع بنشري ملابس للصغار وماحسو بشي .. معا الساعة 6 ونص طلعت من بيت اهلي وروحت لبيتي اخذت حاجياتي وتحممت وجهزت حالي واذن المغرب صليناه وطلعنا وصلنا للمستشفى معا الساعة 9 مساء وكان فكل مرة الوجع يزيد وفالطريق للمستشفى سبحان الله صار وجع منتظم كل 10 دقايق اول مادخلت للمستشفى لقو التوسع 6 سم قالولي اتمشي لحتى يصير8سم وضليت نتمشى في صالة الانتظار ساعة كاملة وكل مرة يتناقص الوقت بين الوجع والوجع معا ااساعة 10 صار بين الوجع والوجع دقيقة بس كشفو عليا لقو التوسع 9 سم دخلوني لصالة الولادة وانا في اخر نفس الحمدلله تمت الولادة خلال 10 دقائق .. ال10:10 كاتبين بالملف وسمعت صرختو وسألتهم بنت ولا ولد قالولي ولد خيطوني بدون تخدير 🥴 واخترت من الاسماء لولدي التاني مطاع الحمدلله عدد خلقه ورضا نفسه وزنة عرشه ومداد كلماته