السلام عليكم بنات كيفكم أخباركم بقول لكم سالفتي .. أنا كانت عندي تقلصات في الرحم من قبل ثلاثة أسابيع رغم إن الجنين سليم وفيه نبض ويتحرك والمشيمة تمام لكن سبحان الله الأقدار بيده أمس بالليل بدأت أحس ببرد شديد مع إني مشغلة المكيف على أعلى حرارة ودرجة حرارة الغرفة ٣٢ مع ذلك أرتجف من البرد ويوم صارت الساعة ١ بالليل قمت من نومي وأحس زادت التقلصات أكثر ثم بديت أحس بألم فضيع يبدأ من أول البطن وينزل لتحت إلى المهبل (طبعًا هذا شعوري) المهم جلست هذي الآلام نص ساعة تقريبًا ثم رحت للحمام تكرمون نزلت مني موية وبما إنه أول حمل لي وما أدري وش السالفة كنت أحسبه بول ونزل معي إسهال مثل الماء 🙊 رجعت لفراشي وصار الألم يزيد ويتقارب يعني قبل كان يخلي لي فرصة أتنفس تقريبًا كل ثلاث دقايق بعدها بدأ يزيد ويتقارب الوقت ثم حسيت شيء بيطلع مني حاولت أروح للحمام ماقدرت دوخت بنص الطريق وجثمت على ركبي ويديني ثم طلع دم كثير صرت أشوفه من تحت الملابس وحسيت بشيء ثقيل نزل 🥺💔 نزلت سروالي لقيت الجنين طايح وفيه زي الخيوط الملتوية ماسكة فيه وماشي لين داخل جسمي يعني كأنه باقي متصل فيني 💔💦 بعدها حاولت أقوم لكن ظهري كان يوجعني جلست مثل القرفصاء طلع شيء يشبه الأشياء اللي تطلع من الخاروف إذا ذبحناه (معليش هذا أقرب وصف لقيته🐏🤷🏻‍♀️) المهم وطلعت الخيوط ماسكه فيه بدأ الدم ينزل مثل الموية بعدها رحت للمستشفى وإلى الآن أنا منومة وكل شوي يسوون تنظيف والله يعين ويفرجها بس حبيت أسولف عليكم ❤️❤️ وسلامتكم والله يتمم عليكم حملكم ويمتعكم بالصحة والعافية ويقر عيونكم بشوفة أطفالكم 🥰♥️