بسم الله الرحمن الرحيم وانتهت رحلة مدتها 9 شهور كلها فرحه وترقب وخوف رحلة وتجربه من اجمل تجارب حياتي انتهت رحلة وهن على وهن وولدت احلى بنوته قبل 35 يوم كان حملي الحمد لله ميسر وما عانيت من اي مشاكل وكان حملي سري للغايه 😅😅 لين وصلت الشهر السادس وفي ناس ما عرفت اني حامل لين ولدت كان موعد ولادتي للمتوقع يوم 7- شهر 8 وفي الاسبوع 38 دارتلي للدكتورة تحريض وكان الرحم فاتح سانتي وكنت اتمشي يوم بعد يوم واعمل قرفصاء واشرب حلبه وقرفه وزعتر وفي الاسبوع 39 دارتلي تحريض مره تانيه وبعد التحريض روحت الحوش تغديت وطلعت تمشيت ورجعت تاني للحوش وفيا الم بس توقعته طلق كادب زي كل ليله...رقد زوجي وانا من الالم ما قدرتش نرقد وقعدت نراقب في الالم مدته والفتره بين كل مره كان مده الوجعه دقيقه والمده بين الوجعه والوجعه من دقيقتين ل4 دقايق...استنيت لساعه 7 الصبح فيقت زوجي وبدانا نجهزو نفسنا واتصلت بالدكتورة حكيتلها اللي صار قالتلي على طول امشي للعياده مشيت للعياده وكشفت عليا الدكتورة ولقت الرحم فاتح 3 سانتي واموري كلها تقول اني حالة وضع قالتلي نفتح كيس الحمل وتنزل الميه تحفز الطلق ويزيد يفتح الرحم قلتلها توكلي على الله...دارولي دخول وجهزوني للولاده واتجهنا لصالة الولاده... وبس فتحت كيس الحمل ونزلت ميه خضرة قالتلي الميه خضره وممكن نولدوك قيصيري انا خفت وقعدت نبكي لان ما نبيش عمليه قلتلها ديري اي شي المهم اولد طبيعي وفعلا طولت بالها معاي وساعدتني وعطتني طلق صناعي صح شفت الموت بسببه وكان مؤلم جدا بس خلال نص ساعه كنت والده وشفت بنتي كانت اروع لحظات عمري وتوا بنتي في حضني نغنيلها ونهز بيها باش ترقد والفرحه مش سيعاني ⁦❤️⁩⁦❤️⁩