السلام عليكم ورحمة الله .. بقول لكم قصتي انا متزوجة من ثلاث سنوات حملت بعد زواجي بشهرين وكان كيس فاضي ونزل بدون عملية تنظيف..  وانتظرت احمل الشهر اللي بعده او بعده ولا حصل حمل المهم بديت بالعلاجات علما اني سليمة انا وزوجي بس الغرض تكثير فرص الحمل والحمدلله ربي ما اراد فقلت لزوجي خلينا نرتاح شهرين او ثلاثه بعدين نشوف علاج . الشهر اللي ما تعالجت فيه توكلت على ربي وطنشت الموضوع وحملت وانا ما ادري وكانت امي تخاصمني دورتك مانزلت وانا اقول ننتظر شوي والحمدلله سويت تحليل وطلع حمل وفرحنا ياربي لك الحمد😍😍 نجي لمشوار الحمل بدات الوساوس والخوف يكون كيس فاضي رحت لاستشاري معروف بدا معي بمثبتات واسبرين وابر ترفع هرمون الحمل عشان يتكون بسرعه وكانت مره بالاسبوع والحمدلله شفنا الجنين والنبض وبعدها جاتني وسوسة ماتحرك او مشوهة او او والحمدلله مر بسلام وكان كل شي طبيعي وكنت ادعي ربي واستغفر واستودع الله جنيني.. نجي للولادة تعديت شهري بيوم واستغرب من اللي تقول عادي انتي بكرية!!  لان كل المستشفيات الحكومي والخاص قالو خطير تتعدين موعدك بخمس ايام المهم اليوم الثاني من العاشر صحيت الفجر الساعه اربعه نزلت الموية وكانت بسيطة مثل البول الله يكرمكم عرفت وفرحت قمت تروشت بموية دافيه وصليت ودعيت ربي وتمشيت في بيتي ورتبته وخلصت شوية اشغال وكل ذا الم بسيط محتمل . صحيت زوجي لصلاة الفجر راح يصلي وجا اخذني وانا طول الطريق ادعي واستغفر رحت لمستشفى حكومي . المهم دخلت تاكدو من الموية انها حقت الجنين وسوو فحص قالو ٢ سم تنويم المهم طلعت فوق بعد تقريبا ست ساعات لان مافي سرير فاضي حطو لي مغذي وعطوني مضادات لان الموية انفتحت وجهاز النبض وصارو كل شوي يمرون علي الى المغرب جاتني وحده قالت بكشف وكشفت قال ٣ سم وقالت لي اذا صارت الساعه ٤ الفجر ما ولدتي بنعطيك طلق صناعي لان مر ٢٤ ساعه على نزول الموية  طبعا وافقت ونمت وصحيت الفجر وانتظر محد جاني 🙄🙄 على الساعه ٨ جاتني دكتورة فحصتني قالت ٤ سم و قالت انتي بكرية بنصبر عليك الى الساعه ٣ العصر بعدها نشوف وانا من تنومت اراقب الالم كان كل ربع ساعه بعدها عشر وبعدها ثمانية وصار سته دقايق بس الالم محتمل وكنت اتنفس بطريقة صحيحة 😲😲 المهم جوني الساعه ٢ قالو يالله الكشك لازم طلق صناعي في الوريد المهم نزلوني وعطوني طلق وركبو جهاز قياس النبض والطلق وصارو يجون ممرضات ودكاترة يقولون انتي مافيك طلق لو في طلق انتا يبكي ويصبح عاد انا كيف افهمهم اني صابرررة .. بديت احس الطلق يقوى والدقايق بين كل طلقه وطلقه تصير ٣ بس . جات دكتورة باكستانية عجوزة قالت للنيرس اعطيها اكسجين يلا يلا حطت لي قلت انا ليش قالت الممرضة عشان بيبي في نوم ؟؟!! قلت انا ما يبغى بيبي نوم كيف نوم انا ولادة طنشتني وراحت المهم وتجي دكتورة ثانية باكستانية تناظر وتروح وانا ادعي ربي واستغفر .. بعدها جاتني دكتورة سعودية طالعت في الجهاز وفيني قمت انا اترجاها اقول الله يخليك اذا في شي قوليلي وهي ترد يا امي مافي شي قلت الله يخليك هذا اول حمل لي وبدعي لك اذا في شي قوليلي قالت ايوه النبض بدا يضعف مره.  انا انجنيت قلت تكفيين قيصري قالت يا امي ترا احنا ما بنخليك اذا تحتاجين اكيد بنسوي اي شي عشان الجنين . راحت وجات ومعها الدكتورتين الباكستانيات قالت وحده منهم لي سوي دعاء سوي صدقه هذي ولادة صعبه زي الم موت قوي مره .. (مدري ليش قالت كذا بس انا في قلبي أقول شكله في شي ) المهم يتكلمون قدامي في كلام افهمه اما مصطلحات طبية لا. المهم صارت الباكستانية تهزأ السعودية ليش تقول لي وانها المفروض ما تخوفني ومدري ايش والسعودية ساكته راحو وبقيت هي قلت لها بالله عليك وش صار قالت النبض مو راضي يرتفع وهم اخصائيات اعلى مني. واتوتر اكثر المشكلة ماعندي جوال اكلم احد وين اروح؟؟!  واجلس اراقب النبض كل ماله ينزل واصيح وتجي الدكتورة السعودية اترجاها ماتخليني قالت طيب بجلس عندك وكلمت جوال . وشوي الا اسمع نداء الى الاستشاري فلان الرجاء التوجه لكشك الولادة والله في قلبي قلت شكله بيجبني وفعلا طلعو ٢ استشارية مصري واردني الدكتور الاردني صار يسب ويهزأ الدكتورة الباكستانية يقول لها النبض نازل والطلق بارد والرحم مافتح الا ٤ سم وش تنتظرين وانا اراقبهم زعلت الدكتورة واسمعها تتكلم المهم وقع على قيصري والحمدلله على تمام النعمة . الحمدلله كما ينبغي لجلال وجهك وعظيم سلطانك . وجبت احلى بنوتة 😍😍