كيفكن صبايا . طبعا أنا من حوامل نوفمبر اخر دورة الي كانت ب 19/11/2018 ولدت الثلاثا الماضي من جمعة تقريبا .. حبيت شاركن قصتي لانو كتيير كنت دور ع حوامل مروا بتجربة الطبيعي بعد القيصري واستفاد من خبرتن . وكانت نسبتن قليلة والحمد لله الله فضلا علي وولدت طبيعي . طبعا انا بكري جبتو قيصري وهي الولادة التانية جبت القمرة بنوتي طبيعي . يعني اول مرة بجيب طبيعي واعتبر بكرية .. رح بلش قصة ولادتي وبلا طوول سيرة عليكن . كان عندي موعد عند الدكتورة يوووم السبت بتاريخ 17/8 عملتلي تخطيط وانا شفت بجهاز عندا انو في طلق خفيف بس التلي لا هي مغصات عادية بتجي لاي حامل بتاسع . وخبرتني انوو ع الأغلب قيصري لاني ح خلص التاسع وماكنت اولد وخيرتني استنى كمان ولا تحددلي قيصري طبعا انا خترت اني انتظر وطلعت من عندا وسووواد الدنيا كلوو بوشي 😔 وابكي وادعي ياربي دخيلك انا بغربة ما الي حدا وابني صغير ازا ولدت قيصري والله لاتبهدل والله العليم بحالي ..😢 ونسيت خبركن صبايا انو بين عمليتي و ولادتي الطبيعية سنة وسبع شهور بس .. مر اليووووم وانا مكتئبة بطريقة غريبة ورووح واجي والو لزوجي خلص نزلني ع الشااام لعند أهلي موووت بيناتن😢😢 الحمد لله خلص يوووم الاكتئاب اجا يووم الأحد والوضع تمام بس الاتنين من الصبح وهو يجيني تحجير يرووح ويجي كل نص ساعة تقريبا تجيني تحجيرة استبشرت خير دقيت لماما وحاكيتا هي واختي والتلن شو عم يصير معي كمااان التانيين سكروها بوشي والولي موطلق😕😕☹ ما يأست رحت أكلت أناناسة كاملة ع العصر والمسا قبل ما نااام شربت ابريق نعنع كبير . ونمت 😪😪 فقت تاني يوووم التلاتا 20/8 وانا وعم صلي الفجر اجتني اول مغصة ضليتني ساكتة ما حكيت شي لجوزي الت لاتأكد . راح ناام هوو وانا رحت غليت كاسة نعنع واعدت اقرأ سورة مريم والانشقاق وفتحت ع النت ع دعاوي لتسهيل الولادة .. وكانت كل تلت ساعة تجيني طلقة .. وكل ما تجيني طلقة اعمل متل ما حكت الصيدلانية رولا قطامي شمي وردة وطفي شمعة . طبعا كانت هي الطريقة تخفف الألم . ع الساعة تسعة فاااق زوجي التلوو جايني طلق الي فوتي ع الحمام وشوفي كيف برووح الوجع 😒😒 مو شكلك ولادة 😤😤 انا دايقت منوو التلوو ضروري صرخ لتتأكد اني عم مووت 😡😡 وامت تحممت و جهزت الشنتاية تبع بنوتي وحملنا حالنا ومشينا ع المشفى الحمد لله كانت الدكتورة متواجدة بدواما . عملتلي فحص ع الساعة 11 التلي الرحم عندك فاتح 3 سانتي لسا بكير رح اعملك تخطيط وترجعي ع البيت . يحرق اخت هالدكتورة ردت يأستني وسكرتا بوشي .😣😣 التلا يعني ولادة طبيعية ان شاء الله التلي في نسبة للقيصرية 25% يا الله دخيلللك ع التشاؤوم .😖😖 نزلت لاعمل التخطيط وعملتوو طلعت فرجيتا ياااه التلي لاوالله لازمك تنويم انتي كل عشر دقايق عم تجيكي طلقة . الطلق كان منتظم . انا حسيت القصة صارت جد😂😂 التلى ما بدي خليني رووح ع بيتي شووي . وطلعت ع مسؤوليتي كان بدي ودع ابني واطمن علي كنت حاسة حالي حموووت 😟😢 رجعنا وجوزي جااب فطوور معو واول ما وصلنا ع البيت صار بين الطلقة والطلقة خمس دقايق .. خفت اولد بالبيت ما اكلت لقمتين التلو لجوزي رجعني ع المشفى .. رجعنا دغري ع المشفى وع الساعة 12 ونص قاستلي الرحم فاتح 4 سانتي . اخدت غرفة واعدت فيا انا وزوجي .. كنت مقررة ما حاكي اهلي . بس ما بعرف كيف دقيتلا لماما واختي وخبرتن😶 شغلتلن بالن الله يهديني 😑 بس كنت محتاجة دعم منن لو حتى حكي ع الموبايل . لدرجة كل ما تجيني الطلقة انا ابكي واختي تبكي من هنييك 💔😢😔 يا حياتي الله يسعدا هالأختي ..❤ وضلت تتقارب الطلقاات لحتى صار بيناتن دقيقتين .. وانا ما ارضى انزل يكشفوا علي خايفة كتير . لحتى خلص الت بلا ما اولد بالغرفة فووق نزلت عملولي كشف ع 5 كان الرحم فاتح 6 سانتي استبشرت خير . ضليتني امشي بسرعة خفّت الطلقات صار وجعا محتمل خفت كتير الت ياربي دخيلك ما يبرد الطلق لانو ما حيعطوني محرض مشان جرحي ..😓😓 لدرجة تجيني الطلقة كل دقيقتين وانا ماشية وضلني ماشية ما اعد او وقف كان وجعا اخف ..🤐 رحت اعدت بالغرفة شوووي الت لناام بما انوو بردو الطلقات شووي 😪 كنت تعبانة لدرجة فظيعة رحت غفلت تجيني الطلقة اعد شووي وارجع ناام . بعدين فجأة قوي الطلق لدرجة فظيعة . هاد يلي حسيتو طلق فعلا وولادة من حق وحقيق .🤤🤤 اعدت بالأرض وامسك هالتخت واسفقو ما عدت تحملت حتى شغلة التنفس يلي بتريح ما عادت فادت .😭😭 تعبت صرت ادعي بصووت عالي مع اني اخدت وعد ع حالي اني كوون صبورة ومارح طلع صوتي ..☻ طلعني جوزي الي اومي نمشي شووي التلوو ما حاسنة ماعاد بدي اولد بدي ناام الله يوفئك بدي نااام .🤕😵 اجاني ارهاق ونعس مو طبيعي بين الطلقة والطلقة .😩😩 بس جوزي كرك علي وسحبني . امشي عادي بس لما تجي الطلقة اعد بالأرض وصير احكي يارب دخيلك بصووت عالي لميت علي المشفى وامسك واقرص جوزي 😂😂 طبعا لاشعوري من الوجع بصير بس بدك تمسك شي بايديك وتشدي علي . صار موعد الدكتورة نزلت لعندا ع الساعة 6 ونص قاستلي الرحم فاتح 8 سانتي ولله الحمد . هون انا ماعاد بدي اولد 😁😁 بدي ارجع ع البيت .😵😵 دغري دقتلن اجوو اخدوني ع غرفة لولادة كان الطلق فعلا قووي لدرجة في نسووان ادام قسم الولادة كانو اعدين واجتني طلقة قبل ما ادخل واعدو بالارض وصرت ابكي واحكي دخيلك ماعاد اتحمل مشان الله رح موووت وهنن اعدو يبكو علي💔😳😳 وزوجي اعد يهدي فيني و يهونا علي الله يجبر بخاطرو ويحن علي .❤ وهون دخلت ع قسم الولادة اعدت ع التخت وحطولي بالسيرروون شي متل المنووم بس مو مخدر يعني نام شووي وبس تجيني الطلقة قوووم ادعي حس لساني تقيل بعد شي 3 طلقات من وقت ما دخلت ع القسم بلشت حس لما تجي الطلقة انو بدي برز انتو اكبر قدر كانت بنوتي عم تدفع فورا دقولا للدكتورة اجت . صار تقلي دفشي وقت الطلقة وانا من الوجع ادفش بس لا ارادي صرخ والله بدوون قصد صرخ مو بإيدي وهي تألي سكري تمك مشان الدفع يكوون مزبووط لحتى اجت ممرضة وحطت ايدا ع تمي وانا اكبس والحمد لله طلقتين كانت بنوتي جاية . وحسيت علين لما قصوو بس كان وجعا اهون من الطلقة الحمد لله الله يسرا علي . بس مارح اضحك عليكن والكن متل غزة الدبووس🤓🤓 في وجع بس لما تخلصي رح تحسي بشعوور حلوو 💛 شعور طفلك اجا ع الدنيا بسلامة ولله الحمد وانتي عملتي انجاز عملتي شي صعب ونجحتي في ..🤷‍♀️ خدروني وعملولي لخياطة بس العذاب يلي عانيت منو البواسير انتو اكبر قدر كانت مبلشة معي بآخر الحمل كبداية وانا اهملتا . ووقت الضغط طلعت وعزبتني كتيير .. والحمد لله ع انتهاء رحلة وهن على وهن وعقبال كل حامل .. وبعتذر ع الاطالة ..