كيفكم حبيباتي ؟ الله يقوم كل وحدة بالسلامة يا رب حابة اشاركم بتجربتي بالولادة لعل غيري من البنات تتفائل خصوصي البكريات اول اشي بشكر الله الحمدلله الي خلقني انثى و اعطاني تجربة الحمل و الولادة لأنها اعظم انجاز بحياة الانثى عنجد كتيير فخورة بإني حملت و ولدت انا يا خواتي الدكتورة حكتلي بولد بشهر ١٢ بآخر يوم بشهري بتاريخ ١٠/١٢/٢٠١٧ بتكوني والدة و الابليكيشن برضو معطيني اني رح اولد ب ١٠ الشهر و كوني مغتربة و لحالي و بكرية حجزت لأمي قبل موعد الولادة ب ٥ ايام قلت خليني اشوفها شوي و اشبع منها و نطلع انا و ياها قبل ما يجي البيبي و ننحبس بالبيت و فعلا اجت امي ب ٥ الشهر و مشيت الايام و عدّت الايام و لسا ما ولدت 😂😂 شبعت من امي و شبعت من الحمل و لسا ما في اي بوادر خلص شهري و انا لسا حامل و الثقل صار لا يحتمل لا بنام زي الناس ولا بقوم زي الناس و صرت جد امشي زي البطريق المهم اخدت زيادة على شهري اسبوع حملت حالي و رحت عالمستشفى قلت للدكتورة اعمليلي اي اشي بدي اولد حكتلي ارجعيلي الجمعة المسا فوتي ولادة رح اعطيكي طلق صناعي لأنو ما عندك اي بوااادر نهائيا و ما عندي توسع و ما في اي اشي رحت عالمستشفى و انا خايفة من الطلق الصناعي بس قلت بتحمل وجع ساعة و لا وجع كل ساعة و حطولي اول تحميلة للطلق كتير بوجع و ما في توسع ردو اعطوني كمان تحميلة بعد ست ساعات برضو ما صار عندي اشي هيك دخلنا بيوم جديد الي هو السبت حولوني عملية 😥😥 فجأة دخلو الممرضات بلشو يشلولي الكحلة و وحدة فكتلي شعري و حطتلي طاقية و انا مو فاهمة اشي صرت ابكي خفت حكولي ما بتخوف حتى ما لحقت اسلم على امي و جوزي حكتلهم باي من بعيد و فتت عالعمليات اخدت تخدير نصفي المفروض اضل صاحية طول العملية و اشوف البيبي بس يطلع و احضنو بس انا لأني ما نمت طول الليل من الطلق الصناعي فتت عالعمليات حطيت راسي و نمت و ما حسيت على اشي بعد ساعتين سمعت صوت بيبي ببكي 😍😍😍 ولا انا والدة الحمدلله جابولي اياه اشوفو من التسطيل الي انا في ما شفته و ندمانة اني ما صحيت و شفتو 😞😞 لأنهم بحكو هاي احلى لحظة و من بعدها طلعت الحمدلله عالغرفة طبعا ألم العملية بلش مفعولة بعد ٤ ساعات من العملية لما بلش يروح التخدير و كان عندي وجع بأكتافي كله غازات و كنت لما اقوم بدي اروح عالحمام ادوخ ما اقدر اوقف لييين المسا مشيت معي الممرضة للحمام و رجعتني عالتخت و بالنسبة لوجع الاكتاف حكولي بروح مع المشي اول يوم ما كنت قادرة قلت ببلش من تاني يوم نشالله و تاني يوم مشيت ٥ دقايق كل ٣ ساعات و بعدين صرت اقدر امشي ١٠ دقايق و هكذا و طبعا مشان وجع العملية كنت اخد مسكن بس الحركة صعبة كانت شوي عند القومة و القعدة و خاصة لما تضحكي او تعطسي 😜 بووجع و استنيت البيبي يجبولي اياه بس للأسف ما جابوه حطولي اياه بالخداج ٤ ايام 😣 كان لافف عحالو الحبل السري خامس يوم جابولي اياه بس بعد شو 😣 ما استعمتعت بلحظتها لأني طول ال٤ ايام كنت ببكي و زعلانة عالبيبي و بس والله هلأ عمره شهرين 😂 الحمدلله عكل حال و الله يقوم كل الصبايا بالسلامة و الله يخليلكم ولادكم يا رب طولت عليكم بعرف بتمنى تكونو استمتعتو بالقصة 😍❤️😍