- انتي حامل؟؟ - آه - خدتي حقن الرئة ؟؟ - لأ - تبقي محملتيش.. "الكلمتين اللي فاتوا دول هزار طبعاً " وستستمر أسطورة حقن الرئة حتى يوم القيامة.. اللي بقت زي البونبوني في الحمل ولا يخلو منها روشتة أي دكتور. قبل ما نعرف إمتى ناخدها وإمتى مناخدهاش وسر انتشارها الغريب دة ،، نفهم الأول يعني إيه حقن الرئة.. دي عبارة عن حقن كورتيزون بجرعة بسيطة تساعد في تكوين الرئة .. ازاي بأة ؟؟ هشرحها بطريقة بسيطة.. عارفة سعادتك لما بتعملي صينية في الفرن وتحطي معلقة زيت في الصينية من تحت عشان متلزقش !! هي دي نفس الفكرة .. الكورتيزون هو الزيت دة والرئة زي طبقتين البالونة لما بتتنفخ وترجع تاني ممكن تلزق في بعضها وتفتح بصعوبة بعد كدة فيحصل صعوبة تنفس للجنين لكن وجود الكورتيزون بيخليها متلزقش في بعضها. ودة معنى مصطلح اكتمال الرئة (( اكتمال الرئة مش معناها الرئة كان ناقصها حتة !!!)) اكتمال الرئة معناها انها تقدر تقوم بوظيفتها أول ما البيبي يتولد ويتعرض لضغط الهواء الخارجي.. ايه دة يا دكتور يعني اكتمال الرئة مش بيبان بالسونار ؟؟ آه والله العظيم .. طيب بندي حقن الرئة لمين ؟؟ - أي حالة متوقع لها ولادة مبكرة زي الحالات اللي بيجيلها ألم من أول شهور الحمل أو اللي بيجيلها طلق مبكر وحالات الإجهاض المتكرر. - معظم حالات التوائم. - حالات الحقن المجهري. - أي حالة بتطلب مني تاخدها أكتر من 50 مرة في اليوم لمدة شهر متواصل .. ساعتها بضعف وبوافق وبقولها اتكلي على الله وخديها يا مدام وحسبي الله ونعم الوكيل . إمتى بتتاخد؟؟ بتتاخد من 24 ل 34 أسبوع .. قبل كدة بيوم ملهاش لازمة (لأنها مش هتنفعه) .. بعد كدة بيوم ملهاش لازمة (لأن خلاص دورها انتهى).. طيب إمتى تكون خطر؟؟ لو كان عندك التهاب شديد في الجسم زي حالات التهاب الغشاء الأمنيوسي حول الجنين لأنها هتزود الطينة بلة وممكن تعمل تسمم في الدم !! وبالنسبة لمرضى السكر لازم تتاخد بحرص شديد وقياس نسبة السكر في الدم وممكن نحتاج نزود جرعة الإنسولين. ((ملحوظة أخيرة)) العمر الرسمي لاكتمال رئة الجنين وثقة الطب في إنه ميحتجش حضانة بإذن الله 37 أسبوع .. لكن طبعاً فيه حالات تانية ممكن الجنين يحتاج فيها الحضانة بعد اكتمال نموه ملهاش علاقة بالرئة ومش بإيد الدكتور.