اول شي انا من حوامل ٨ جولاي ولدت بالاسبوع ٣٨ تاريخ ٤ ابريل الله يسلمكم انا رحت موعد عادي مراجعة كل اسبوع بالتاسع وذاك اليوم سبحان الله تكيسلت اروح قلت بنتظر الولادة وخلاص لين نغزني قلبي وحجزت موعد ورحت كشفيه عادي ودخلت عند الدكتوره تعبانه وقالت بقيس لك واسويلك تحريض طلع توسع بس ١ سم وقلت لها ابي اليوم اسوي اشعه نشوف موية الجنين ووزنه (علماً ان وزنه كان طبيعي بس قلت المويات بالثامن ورجعت طبيعي) المهم قالت طيب مع انه مايحتاج ورحت سويت اشعة وطبيبة الاشعة فجاه انقلب وجهها وقالت ارجعي لدكتورتك ضروري الحين! انا خفت ورجعت لها وقالت المويات عندك نزلت والبيبي وزنه وزن اول يوم بالتاسع وانتي الحين نص التاسع مانقدر نخاطر فيك وتقل المويات اكثر ونضطر نولدك قيصري الحين بندخلك طلق صناعي! انا هنا وجهي صار خبز مفرود مافيه معامل سكت مارديت😂 قلت وش طلق صناعي وش الحين ندخلك لا وييين عندي اشغال ماخلصتها! قالت اجل توقعين على مسؤليتك وترجعين بكرا الصبح قلت طيب دخلت المستشفى ١١ الصبح وانا مانمت من الطلوق بعد التحريض وطلع توسع ٤ سم وقالو بنصبر عليك يمكن تولدين بدون طلق صناعي صبرنا وصبرنا ومشيت ومشيت بس برد الطلق وقفل الرحم نص سم ، جت الساعه ٤ العصر طلبت ابرة الظهر قبل الطلق الصناعي والحمدلله اني طلبتها ياجماعة الناس مدري ليه متخوفة منها وهي نعمة من ربي! والله بعدها حطولي تحميلة طلق صناعي ونمت واقوم شوي احس بارهاااااق بس ما احس باية الم بس ارهاق الطلق لان بدا يحمي ووصلت ٦ سم وفجرو لي المويات على الساعه ٨ وبديت احس بالمممممم طلوع الراس والدفع يا جماعة ما ادري كيف لو مو طالبة ابرة الظهر كيف بيكون الالم مضاعف والله اني وصلت مرحلة ابوس يدينهم يعطوني اي شي يوقف الالم صرت اصرخ انا بموت 😭💔 والساعه ٩ حسيت بدفع قوي وساعدتني الدكتوره كيف ادفع لاني من قوة الالم صرت مدري انا ويني و الحمممدلله رزقني ربي باميرتي الصغيرة الله يحفظها ويخليها لي ويرزق كل مين بغى ويسهل على كل حامل والله دعيت لكم وقت الطلق كل مين في هذا البرنامج ان ربي يسهل عليكم ويرزقكم الضنى الصالح