ابشركم اخواتي اني ولدت من اسبوع.. يعني بأول يومين بالأسبوع 40 .. بس لسه هلا فضيت احكي قصة ولادتي، طبعاً أنا بكرية من حوامل 15 اغسطس ❤ متل هاليوم الأربعاء الأسبوع يالي مضى بدأت عندي آلام الولادة.. الساعة12 الظهر بدأ الوجع وكان محتمل متل ألم الدورة، بالبداية ما اعطيته اهتمام قلت اكيد متل كل مرة وجع بيجي وبيستمر شي ساعة وبيروح.. بس لقيته مستمر ومنتظم وكل ساعة عن ساعة بيزيد وبيتقارب فعرفت انها ولادة 😍 وقلت يلا الحمدلله اخيراً رح اولد وارتاح.. كنت كل هالوقت بالبيت متحملة الوجع وصابرة وزوجي ربي يحفظه معي بيدعمني ويساندني لحتى صارت الساعة5 العصر اتصلت بأمي مشان تجي وتكون معي لان اهلي ساكنين بعيد شوي .. بعد الفطار اخذني زوجي ع المستشفى وفحصتني الدكتورة لقت عندي توسع لسه 2 اصابع ، قالت ارجعي البيت اشربي حاجات دافية وامشي .. قلت لها كتير موجوعة كان الوجع عندي كله بالرحم واسفل البطن مافي الم بالظهر.. المهم قالتلي اتحملي البكرية هيك بتطول .. رجعنا البيت حطيت رجولي بمي ساخنه ودهنت ظهري واسفل بطني بزيت زيتون دافي مع حبة البركة.. وشربت كوب قرفة ساخن.. وعم بمشي وبدعي وبحاول اتنفس بشكل صحيح مشان اساعد حالي واخفف الوجع ، صرت كل ما اجى الوجع بشم وردة وبطفي شمعة 😂 شميت ورود كتير هداك اليوم وطفيت كتير شمعات .. واجوا اهلي وانا على هالحالة لحتى صارت الساعة 12 بليل بدت تنزل مادة مخاطية مع دم واستحملت والالم كان كتير صعب بصراحة.. وضليت هيك لحد الساعة 2 بليل قلتلن خلاص مو قدرانه قوموا خدوني ع المشفى لاني صرت لما بشم وردة مابقدر اطلع الهواء من تمي واطفي شمعة صرت بحس ان بدي ادفع لتحت وان راس البيبي كتير نازل.. حملت حالي واخذنا شنطة الولادة ورحنا ع المستشفى وفحصتني لقت عندي توسع 2 اصابع ونص!! يعني هداك الوجع كله مازاد التوسع عندي غير نص اصبع 😢😭 قلت لها شو العمل هلأ أنا مابدي طول اكتر من هيك كتير موجوعة.. قالتلي الحمدلله الطلق عندك تمام وانقباضات الرحم بس التوسع عندك ضعيف مشان هيك رح نعطيكي مغذي بالوريد بيوسع عنق الرحم ورح فكلك مية الراس.. قولتلها المغذي هاد طلق صناعي قالت لا مو طلق صناعي لان الطلق عندك طبيعي بس هاي مشان التوسع قولت اوكي توكلنا على الله.. وفوتت ايدها وفكت لي مية الراس حسيتها نزلت عليي كتير دافية وقوية وكمية كبيرة ماشاء الله، وبدأ الألم يشتد ويشتد لحد الساعة 3 ونص الفجر قلتلهن خلاص مو قادرة صرت بحس ان راس البيبي ضاغط بقوة لتحت وانا بيجيلي شعور تلقائي بدي ادفش ، لما فحصتني لقت انو الحمدلله التوسع صار 10 سم، قالت يلا ولادة.. وطلعت ع كرسي الولادة بسرعة قالتلي اذا حسيتي انو بدك تدفشي ادفشي بكل قوتك ودفشت اول دفشة وبعدها دفشتين قالتلي تمام ليكو باين شعر رأس البيبي استمري وانا كنت خلاص هلكانة ودفشت وفجأة حسيت بالمشرط لما قطعت الجلد للتوسيع مشان يمر رأس البيبي ودفشت كمان دفشتين والحمدلله طلعت بنوتي للحياة وسمعت صرختها لأول مرة وحطتها لي على صدري ويالله شو حسيت حالي خفيفة وكل الاوجاع راحت.. يعني الساعة 4 الفجر كنت خلاص ولدت.. بعدين اخذوها ليحمموها وهيك.. وانا دخلت في مرحلة ولادة تانية يالي هي تصفية الرحم ويالله شو بيوجع تنظيف الرحم وسحب المشيمة والتخييط بس الحمدلله الوحدة لما بتشوف ضناها بصحة وعافية كله بيهون 💖🌸😍 والحمدلله تجربة حلوة وفيها ألم اكيد مافي شي بيجي بالسهل وبدون الم بس حسيتها ولادة مسهلة الحمدلله وفيها صبر كتير يارب يكتب اجري واجر كل حامل وكل والدة يارب